Actividaes

Andecha Nacionaliega aconceya col pueblu occitanu 3.04.08

El día 16 de marzu, coincidiendo col 764 aniversariu de la masacre de 226 cátaros acusaos d’herexía, representantes de l’Institut d’Études Occitanes de l’Ariège, de Convergencia Occitana (federación de 56 asociaciones occitanes), de partíos políticos… aconceyaron al pie del castiellu de Montsegur nun actu de reafirmación de les señes d’identidá del so país. Al actu asistieron Lali García y Chusa Varela, d’Andecha Nacionaliega, organización política integrante na coalición UNIDÁ.

AN participa nun actu políticu colos occitanos

Nes sucesives intervenciones falóse de “los arcaísmos del pensamientu nel qu’el poder ta penriba’l derechu, onde’l pensamientu únicu amarra les diferencies”, de les masacres del Tibet, Chechenia, Kurdistán asemeyaes a les del pasáu, del despreciu de les autoridaes haza una llingua na qu’escribía’l Premiu Nobel Frédéric Mistral… Tamién –al ser esi día 16 d’eleiciones municipales- fízose un llamamientu a los “escoyíos” a puxar pol “occitanismu”, na llínia de les calandretas (escueles con enseñanza billingüe pa toles materies en francés-occitanu), llogru algamáu en 2007. Pa finar, fízose alcordanza de qu’en 2009 va ser el 800 aniversariu del entamu de la cruzada contra los albixenses convidando a les autoridaes de Midi-Pyrénées a conmemoralo y cantóse l’himnu occitanu.

Castiellu de Montsegur

---