Actividaes

Homenaxe n'Avilés a los revolucionarios del '34 31.10.07

L’agrupación d’Avilés d’UNIDÁ cellebró el pasáu sabadu 27 d’ochobre l’actu central del homenaxe a los revolucionarios del 34 con una concentración na Cai del Sol na que hebio delles intervenciones, colocándose darréu un ramu de flores na antigua cárcel d’Avilés.

Entamó l’actu Vitor Suari, en nome de EMIR (Ensame de la Mocedá Independentista y Revolucionario), afitando el proyectu nacionalista y de izquierdes de la so organización, un proyectu que tien a UNIDÁ como referente políticu y estratéxicu. Nun podíen faltar unes pallabres de Vitor Suari n’honor d’aquel grupu de revolucionarios del 34, poniéndolos como exemplu a siguir n’esta Asturies ensin futuru pala mocedá.

Discursu de Vitor Suari, miembru d’EMIR.

Darréu faló Paco Iglesias en nome de l’agrupación de UNIDÁ d’Avilés nuna intervención cargada d’emotividá al remembrar cómo aquelos homes y muyeres del 34 nun yeren grandes intelectuales ni grandes políticos de mases, yeren homes y muyeres qu’en aquellos momentos entendieron qu’el so compromisu yera defender a la clas obrera asturiana pola que dieron la so vida. Y, al empar de Vitor Suari, púxolos como exemplu a siguir nel enfotu d’algamar tamién agora una Europa y una Asturies socialista.

Discursu de Paco Iglesias, coordinador d’UNIDÁ Avilés.

Juan Manuel Martínez Morala, Secretariu Xeneral de la Corriente Sindical d’Izquierdes peslló l’actu faciendu un repasu a la situación llaceriosa d’Asturies nel planu políticu, económicu y social. A naide se-y escapa que Morala ye conocedor como pocos del desaniciu de la industria y de los puestos de trabayu, de la precariedá y temporalidá del empléu y del paro n’Asturies, de la emigración forciada de la mocedá, y tamién victima en carne propia de la represión y la violencia istitucional. Por eso la so intervención tuvo marcada pola necesidá de la xunión de fuercies, que ye tantu como dicir que hai que abandonar “el sectarismu y l’individualismu” en pallabres del propiu Morala, como ya nos enseñaron nel so día los revolucionarios del 34, a los que dedicó tamién una emotiva alcordanza.

Discursu de J.M.Martínez Morala, Secretariu Xeneral de la CSI

Finó la concentración con la colocación d’un ramu de flores ante l’antigua Cárcel d’Avilés, güei Oficina de Turismu, remembrando a los 70 revolucionarios que perdieron la vida nella dempués de ser fechos prisioneros.

Actu na antigua carcel d’Avilés