Anuncies

UNIDÁ denuncia la falta de presupuestu na carrera docente 26.09.07

LA CARRERA DOCENTE, ENSIN PRESUPUESTU Y COLA INCERTIDUMBRE DE LA SO APROBACIÓN: UN ENGAÑU MÁS AL PROFESORÁU

Cinco díes enantes de la fecha de les pasaes eleiciones autonómiques y municipales, la Conseyería d’Economía publicó nel BOPA una resolución pola que se abre la vía voluntaria de l’aceptación de la ‘carrera docente’ de los 12.000 funcionarios de la enseñanza non universitaria del Principáu que lleven más de cinco años de trabayu. Esta convocatoria foi aceptada por un total de 7.000 profesores según la Conseyería. Col nomatu ‘carrera docente’ denómase a la futura carrera y desendolque profesional qu’entovía ta por definir y aprobar. Ofreciose cobrar más dineru con calter retroactivu al ún de xineru de 2007 a quien robrare’l compromisu voluntariu d’aceptación, sin especificar les obligaciones contrayíes a cambiu d’esta firma, dao qu’entovía tan ensin aprobar.

Dende UNIDÁ denunciamos qu’entovía nun esiste conseñamientu presupuestariu pa entamar esta midida, porque nun figura nes previsiones del Presupuestu de 2007 pal Principáu, que foi aprobáu al terminar l’añu 2006, y qu’habrá qu’esperar a l’aprobación del Presupuestu de 2008 na Xunta Xeneral, too ello nel casu de que se produza tala aprobación. Paeznos por ello que fue una midida eleutoralista ensin base presupuestaria, que valió al PSOE p’algamar rentabilidá eleutoral, col agravante de que, dempués de la firma, el profesoráu nun sabe cuáles son les obligaciones qu’acostina tala firma, a la escontra de lo qu’asocedió colos funcionarios de la sanidá, qu’amás sí tienen reconocencia presupuestaria del alcuerdu algamáu dempués de la fuelga. Too ello, ensin escaecer qu’esti procesu fízose ensin contar cola mayoría de sindicatos de la enseñanza. Por ello, UNIDÁ presentó en xunetu un contenciosu escontra esta resolución, al igual que lo ficieren los sindicatos SUATEA, CCOO y CSIF. La falta de dotación presupuestaria ye una razón más pa incluyir nel contenciosu, pa tratar de valtiar esti decretu y obligar a una negociación coleutiva sobre una carrera profesional que seya remunerada, pero tamién asumida pol conxuntu del profesoráu.

Xunta Coordinadora d'UNIDÁ