Anuncies

DENUNCIEN LA MARXINACION D'ASTURIES NEL MODELU ACTUAL

UNIDÁ presenta les sos propuestes de configuración del estáu 27.02.08

La coalición refuga’l mitu de l’Asturies subvencionao y propón el pasu d’Asturies a primer división a traviés de la reconocencia del caráuter de nación

La cabeza de llista al Congresu pola coalición UNIDÁ, Lali García, acompañada del cabeza de llista al Senado, Ignaciu Llope, presentó esta mañana les propuestes electorales sobro’l modelu d’estáu y el papel d’Asturies nel mesmu. García alvirtió sobre “la condición marxinal d’Asturies nel panorama políticu anguaño, porque nos atopamos con un estatutu de tercer división que nin siquiera pudiemos votar y que nun reconoz elementos esenciales como la oficialidá de la llingua asturiana nin la condición nacional del nuesu país”.

La cabeza de llista afirmó que “anguaño nun hai nenguna formación política con representación que defenda abiertamente midíes que tornen la marxinación d’Asturies con una postura desacomplexada que nos asitie en primer división reconociendo tanto la plurinacionalidá y el plurillingüismu del estáu como la necesidá de que’l nuesu país seya reconocíu como una de les naciones integrantes del mesmu, polo que resulta más necesaria que nunca la existencia nel panorama políticu d’una opción como UNIDÁ”. La candidata afirmó amás que “ye preciso acabar col mitu de l’Asturies subvencionao y negociar col estáu un modelu fechu dende Asturies y p’Asturies porque sin soberanía fiscal pa poder xestionar los nuesos impuestos nun pue haber autogobiernu políticu”.

Pel so llau Ignaciu Llope incidió nesti puntu recordando que “los parámetros que polos que se mide’l nivel d’inversión del estáu n’Asturies inclúin les grandes infraestructures con un beneficiu que nun queda equí, sinón que revierte n’empresas foriates dexándonos la destrucción del medio ambiente” y solliñó que “los asturianos somos los que más aportamos n’impuestos venceyaos col consumu”. D’igual manera, remembró que “ye posible que la configuración del gobiernu estatal depués de les elecciones del 9 de marzu lleve a la evolución del estáu camín d’un modelu nel que se consagren constitucionalmente les diferencies ente los pueblos que seyan consideraos nación y los que son considerados rexones”. Llope siguió comentando que “tien más pesu na decisión del nuesu futuru un diputáu de Soria, Madrid o Aragón qu’un ciudadanu asturianu y los representantes asturianos en Madrid son brazos de madera al serviciu de les maquinaries electorales de los grandes partíos, polo que ye necesaria una alternativa que namás respuenda a los intereses d’Asturies”.

Pa cabu Lali García solliñó cuatro de les midíes qu’UNIDÁ inxer nel so programa:

1. Reconocencia del caráuter plurinacional, pluricultural y plurillingüísticu del Estáu, con Asturies como una de les entidaes nacionales integrantes.

2. Soberanía fiscal qu’asegure la negociación d’un modelu de financiamientu que s’adapte a los intereses d’Asturies y garantice que podiamos xestionar los nuesos impuestos, compensando la nuesa marxinación histórica.

3. Presencia directa asturiana nos órganos de la UE pa que podiamos xestionar directamente tolos asuntos que competan a Asturies.

4. Reforma del Senáu y conversión del mesmu nuna cámara de representación territorial.