Anuncies

UNIDÁ propón declarar el texu d'Abamia como Monumentu Natural 3.11.07

Según la Llei 5/1991, de 5 d’abril, de Proteición de los Espacios Naturales del Principáu d’Asturies contempla, nel artículu 13, que “aquellos espacios del territoriu rexonal que contengan elementos y sistemes naturales d’especial interés o valores naturales sobresalientes podrán ser declaraos protexíos d’alcuerdu colo regulao nesta Llei”, y según el artículo 19 de la mesma “los monumentos naturales son espacios o elementos de la naturaleza constituyíos básicamente por formaciones de notoria singularidá, rareza o guapura, que merecen ser oxetu d’una proteición especial”.

Texu d'Abamia

Per otra parte, el texu ye una planta que pertenez al catálogu de flora amenazao del Principáu d’Asturies, siendo sobradamente conocíos el so valor hestóricu, la so guapura y la so estrecha relación con Asturies. Nesti sen, el texu d’Abamia destaca pola so antigüedá, al rodiu de los 500 años, y pol so simbolismu hestóricu, al tar venceyáu a la tamién hestórica ilesia de Santa Olaya d’Abamia. Ye poco comprensible que xunto a los texos de Bermiegu, Santa Colomba, Santibanes de la Fuente, Llagu, Salas y Pastur, declaraos nel so día monumentos naturales, nun se reconociere tovía esta categoría de proteición pal texu d’Abamia.

Dase la circunstancia de qu’el texu d’Abamia atópase nestos momentos nuna situación llaceriosa por mor d’unes obres de supuesta rehabilitación de la ilesia, qu’orixinaron el corte de los raigaños de la fastera Este, a consecuencia de la escavación d’una zanxa de 40 cm. de profundidá y más de 10 metros de llargor, averada a una muria esistente ente’l texu y l’atriu: ye una razón adicional pa solicitar que se proceda urxentemente a incluyilu na Rede d’Espacios Protexíos del Principáu d’Asturies.

Polo tantu, UNIDÁ solicita que s’entamen los trámites afayaízos para declarar el texu d’Abamia Monumentu natural, según lo dimpuesto na Llei 5/1991, de 5 d’abril, de Proteición de los Espacios Naturales del Principáu d’Asturies, y nel Plan d’Ordenación de los Recursos Naturales d’Asturies (PORNA).