Mocedá

BASTA YÁ de corries de toros n'Asturies 18.10.07

Cola escusa de les fiestes de San Matéu nel conceyu d’Uviéu, el vienres día 21 setiembre, los uvieínos y uvieínes tuvimos qu’adolecer una vuelta más la fechura na plaza toros de “Buenavista” d’una “Grandiosa Corrida de Toros”. Cuntamos cola presencia nel nuesu conceyu de trés de les “figures” más grandes d’esti festexu criminal y dende EMIR–Uviéu amosamos dafechamente’l nuesu refugu a tal actividá asistiendo a la concentración convocada pola asociación “ANADEL”.

Concentración convocada por Anadel n’Uviéu.

Baxo’l lema “BASTA YÁ” quiximos denunciar lo que vien darréu:

- La tauromaquia namái que ta afalada nel conceyu y nel país por partíos españolistes, principalmente’l PP, xustificandose nuna supuesta tradición, que n’Asturies nun se da y qu’amás nun xustifica masacre tala.

- Les perres públiques que dende l’Ayuntamientu d’Uviéu se vienen apurriendo a esti tipu d’actos-per aciu de sovenciones o merca d’entraes- supón sofitar la violencia ensin xacíu y un comportamientu incivilizáu escontra los animales, fechu presenciáu por munchos mozos, más sensibles a esti tema y que según los estudios pue trestornar la so personalidá n‘época adulta. El gastu económicu añal que remanez de la tauromaquia supón una cifra bultable cola suma de del caltenimientu de les places de toros, aguapecimientu nes feches señalaes, los cartelos, la Banda municipal de música, merca d’entraes por valir de 60.000 euros…too ello col envís, inútil, d’enllenar la plaza.

- Dende los partíos gobernantes tán poniendose tolos esfuercios en tapecer o desaniciar los aspeutos culturales llariegos tanto no cultural, no hestóricu y no llingüísticu, mentanto intenten llantar cellebraciones de calter minoritariu y foriatu con escasu sofitu social como estes.

Dende EMIR vamos siguir diciendo “BASTA YÁ” a too esti circu y, poro, continuaremos na xera de poner fin a esti “festexu”, esixendo la so abolición, la declaración d’Uviéu como conceyu antitaurín y el baltíu de la plaza pa enanchar el parque esistente.

Vitor Suari

Miembru d'EMIR