Opinión

Cándido y Morala 13.07.07

German Abad

Secretariu d'organización d'AA

Bien ta lo que bien acaba. Anque’l penosu espectáculu ofrecíu polos nuestros gobernantes, que vienen de ganar nes urnes otra vuelta, entovía nun finó, pue dicise yá que la batalla ta ganada, y Cándido y Morala son ciudadanos en llibertá, condición que perdieron durante 19 díes, mientres esos gobernantes pretendíen que durara hasta tres años.
El vergoñosu encarcelamientu de Cándido y Morala funde los sos raigaños na reforma del códigu penal d’Aznar, reforma que cuntó col sofitu del PSOE y que tá enveredada a sospechar de tol mundu, y a obligar al inocente a que demuestre que lo ye realmente, sobre too si tien “pelligroses” idees non coincidentes colo que’l PP y el PSOE consideren políticamente correcho. Venimos de velo con Cándido y Morala: inda nel mui duldosu supuestu de qu’hubieren tascao una cámara de video, el códigu penal y el xuez nun dubien n’aplica-yos la “ley antiterrorista” y condergalos a tres años de cárcel. Yá puestos a condergar, apliquemos tamién esa llei a quien-y petó entrar nuna guerra a base de bilordios. ¿Cuántos seríen entós los años de cárcel?
Pero nun nos engañemos, l’amenaza escontra tol que cafie al poder sigui ehí. Cándido y Morala son llibres pola presión del gran movimientu de protesta pero tamién lo son porque nin el PSOE nin IU podríen soportar una campaña eleutoral pa les eleiciones xenerales con ellos na cárcel. Cada vez vese más nidio la parte d’escarmientu y vengación qu’hai na decisión frustada d’encarcelar a Cándido y Morala. Yá sabemos cómo les gasten los Churruca (IU), o los Trevín y Felgueroso (PSOE). Esta vegada nun resistieron al deu acusador, pero siguirán intentándolo. L’amenaza caltiense, lo que nun mos torga dar la más grande de les norabones a Cándido y Morala, pola so honradez ya integridá nos peores momentos, y pola so llarga trayectoria exemplar na defensa de los trabayadores, que tantu coscoyu cría en dalgunos políticos de la seudoizquierda gobernante.