Opinión

Discursu d'ochobre/Presentación d'EMIR 28.10.07

Vitor Suari

Miembru d'EMIR

Collacios y collacies:

Tamos equí güei miembros tantu d’UNIDÁ-Avilés como d’UNIDÁ a nivel nacional y Juan Manuel Martinez Morala, secretariu xeneral de la CSI pa facer un homenax n’alcordanza de los revolucionarios y revolucionaries d’ochobre que va yá más de 70 años llucharon por una Asturies socialista.

Nun se m’ocurre un marcu meyor qu’esti pa la presentación d’EMIR, l’ensame de la mocedá independentista y revolucionario. Un proyeutu mozu que yá col nome dexa bien nidio’l so plantegamientu políticu y que nagua por creyar un nuevu espaciu nel qu’afayar los ideales nacionalistes y d’izquierdes dende la mocedá, con UNIDÁ como referente políticu y tamién estratéxicu yá que namás que dende una verdadera xuntura del nacionalismu en tolos ámbetos, tanto a nivel de federación de partíos como de mocedá, sedremos quien a tener daqué de puxu ente la sociedá asturiana y llegar a incidir de manera granible nes instituciones. Poro, la xente mozo que naguamos por lluchar por un futuru meyor pal nuesu país, representamos sangre nuevo que nun por ello tien menos ganes de trabayar nin menos valir, nós sedremos los que garremos el relevu de les xeneraciones anteriores y los que formemos parte del encadarmamientu futuru d’Asturies. Dende EMIR nun queremos heredar un país qu’escaeció la so identidá y que perdió‘l drechu a decidir el so futuru por ser namás qu’una rexón española más, nun queremos que la nuesa llingua quede arrequexada nun muséu cutre y estartaláu, queremos que seya la llingua cola que nos espresemos dende Asturies al mundu como lo que somos, asturianos. Refugamos un modelu económicu egoísta y que ta medrando les diferencies sociales, creando probeza y esfarrapando’l nuesu mediu ambiente, en definitiva, al igual que los homes y muyeres d’ochobre ’34 naguamos por un cambéu, una revolución social que mos faiga dueños del nuesu destín como pueblu.

Güei como ayeri;

¡PUXA ASTURIES SOCIALISTA!

¡PUXA ASTURIES DIXEBRÁ!

Ensame de la mocedá independentista y revolucionario
27-10-2007
Avilés