Opinión

El Derechu Consuetudinariu Asturianu tien que recoyese col grau de Llei. 8.10.07

Xicu Mata

Miembru de la Xunta Executiva d'Andecha Astur

Cola publicación del Dictamen de la Comisión Especial de Derecho Consuetudinario Asturiano llógrase refrendar el primer pasu para dar usu al artículu 16 del Estatuto de Autonomía del PPAA (“El Principado de Asturias impulsará la conservación y compilación del derecho consuetudinario asturiano. “), que tien como fin últimu la consecución de una Llei de Derechu Civil d’Asturies onde se recueyan les figures xurídiques del Derechu Tradicional asturianu y del Derechu Consuetudinariu asturianu.
Esta Comisión Especial entamó l’estudiu’l 27 de Xunetu de 1999, dieciocho años dempués d’aprobase l’Estatutu d’ Autonomía y tardó dalgo más de siete años en ponese a disposición del Gobiernu (Marzu de 2007) tres analizar una gran cantidá de los documentos xurídicos que s’atoparon nestos años, difícilmente admisibles xurídicamente por ser munchos d’ellos aspectos arraigonaos a la costume y la cultura oral, pero non por ello menos escarecíu de valor.
Asina, nel puntu 4 del Dictamen faese mención de la necesidá de tener permanentemente actualizáu’l bayurosu patrimoniu cultural que supón esti estudiu pormenorizáu de la tradición asturiana y promover midíes para protexer, preservar y fortalecer l’usu de les figures que formen la Compilación.
Na mesma, ellabórase un “Catálogo de Costumbres Compiladas” de les que resume unes ventiún costumes, dexando otres ensin añadir por creeles minoritaries, que quiciás seyan mencionaes nun futuru por nuevos estudios nesta materia. Dende l’andecha, l’antoxana, l’aparcería, la poznera, el bistechu o’l cierre con finxos, pasando pola casería, la compra-venta d’animales o la viudedá universal.
Esto ye namás un analís a grandes rasgos de la importancia de llograr qu’esti Derechu tenga rangu de Llei (en Galicia aprobóse en 2006 la LEY 2/2006, de 74 de junio, de Derecho Civil de Galicia, onde se menciona’l derechu consuetudinariu gallegu) dao que depende d’ello la supervivencia de les nuestres particularidaes, que nos definen como pueblu asturianu y, poro, la nuestra identidá coleutiva asturiana.