Opinión

Faciendo camín 30.03.08

María Olaya Rubiera

Andecha Nacionaliega

Pasaes yá les eleiciones y dempués de tomar unes curties vacaciones, toca facer una llectura del panorama políticu n’Asturies. Yá tol mundu-y echó la culpa de los malos resultaos al bipartidismu, poro yo nun voi gastar más pallabres nello. Asina que teo que mirar pa los resultaos algamaos polos partíos nacionalistes d’izquierdes. Lo primero que rescampla ye que dalgunos, anque nun faen más que colgase medalles, nun xorrecen un res magar que lleven casi vente años aporfiando. Per otru llau, tán los que yá se dieron por vencíos, tuvieron la so oportunidá nel parlamentu asturianu y nun supieron aprovechala. A lo cabero ta UNIDÁ. Ye la primer vegada que nos presentamos a les Estatales y pruyíanos asitianos nel marcu políticu de la izquierda nacionaliega, pero nun supimos tresmitir el nuestru enfotu. Poro, tenemos que camudar la manera de llegar a la xente.
Nun mos val el camín yá trilláu, un camín que dalgunos quieren recorrer solos anque seya xubiendo per una fana ensin cuerdes y naide que te suxete enriba. Per otru llau tampoco nun tienen que valinos los métodos tradicionales de facer política de los partíos estatales, nun se trata de mimetizase con ellos. Esi camín ta mui transitáu y yá nun convence a naide. Al mio parecer, hai qu’escoyer un camín nuevu, EL CAMÍN de dir de la man de la xente que ta farta de los políticos que nun faen más que meter perres en bolsu, el de la xente que tien que colar d’Asturies porque equí ya nun hai malapenes trabayu, el de la xente que se mueve porque ta farta de que-y quieran poner llinies d’alta tensión a la vera la so casa o direutamente afogala. Hai muncha xente que ta farta del sistema democráticu del votu cada cuatro años: ye con ellos colos que tenemos que tar coldu con coldu trabayando, si queremos multiplicar por diez los resultaos algamaos nes caberes eleiciones. Pero’l camin tien que ser nuevu, ensin tener mieu de poner les cartes boca enriba, de sentinos mui orgullosos de ser asturianos y de que seamos tolos asturianos los que tengamos derechu a decidir el nuesu destín. Queden tres años fasta les prósimes eleiciones, y nun vamos retiranos del panorama políticu, vamos siguir aporfiando, “currando” con más ganes y ensin danos por vencíos. Ye Asturies quien mos necesita, nun vamos dar ni un pasu p’atrás.