Opinión

La FSA ya apuesta claramente na crisis d'Andecha Astur 1.05.07

Roberto Holgado

Coordinador y miembru de la XE d'Andecha Astur

Nun ye mui corriente que les casualidaes determinen la vida política, y muncho menos en países como Asturies, onde depués de venticinco años sigui gobernando’l mesmu partíu colos mesmos protagonistes que na llamada transición.

Pensar que les coses en política pasen de manera espontánea ye d’ ilusos o d´incoscientes. Y digo esto al rodiu de la crisis d´Andecha Astur, con la consiguiente anulación de les candidatures de UNIDÁ, en rellación colos medios de comunicación oficiales de la FSA.

La cobertura informativa qu’estos medios-y dan a la nuesa organización ye más bien probetaya, cuando non práuticamente inesistente. Les anuncies alredor del casu “Construyendo Asturias”, primero, y de l’anulación del PXOU de Llanes después, foron la esceición a la norma, onde a talos medios nun-yos quedaba otru remediu que pasar sapos y danos el tratamientu que les noticies merecíen. Nestos casos, tanto la RTPA, La Voz de Asturias o la Cadena SER, de la que trataben la noticia, reconocieron a unos voceros oficiales: Germán Abad, como Secretariu d’Organización, o a Lali Rubiera, como Secretaria Xeneral, como nun podía ser d’otru mou. Hasta equí, normal.

Lo que yá nun ye tan normal y pasa a ser sospechoso, ye que cuando la crisis d’ANDECHA ASTUR pasa al tarrén elleutoral, aquellos qu’enantes consideraben a Germán Abad o a Laly Rubiera como Secretariu d’Organización o Secretariu Xeneral respeutivamente, d’un día pa otru, y ensin tener-en principiu- el mínimu conocimientu de la nuesa situación interna, de mou sistemáticu, empincipien a considerar a éstos como los representantes del seutor críticu d’ANDECHA. Los medios de comunicación arreyaos a la FSA faen un apueste por sofitar les tesis d’un seutor d’ANDECHA ASTUR encabezáu por Marcos Abel Fernández y Arturu Xosé Bermeyu auto denomaos como Executiva de la Organización, ello ye, los voceros oficiales d’ANDECHA ASTUR.

Ye raro y tamién sospechoso, recalco, que nun tema tan abegosu, estos medios tomen postures tan a les clares, favoratibles a les tesis d’una parte y a la escontra de los qu’hasta güei los consideraben como los interlocutores oficiales. Como enantes conseñaba, pensar qu’estes coses pasen de casualidá ye d’ilusos o d’inconscientes. El posicionamientu de los medios venceyaos a la FSA nun ye casual. A estes altures de la vida ye fato pensar que la FSA nun sepa lo que pasa na izquierda nacionaliega, teniendo en cuenta que tamos énte una Organización fondamente centralista y asturfóbica.

De too esto, les entrugues que faigo son: ¿Qué interés pue tener la FSA na situación d’anguaño de la izquierda nacionaliega? ¿Interésa-y a la FSA que la izquierda nacionaliega faiga un apueste decidíu d’aportar a les instituciones?. Les rempuestes son bien cencielles: interés, muncho y lo que ta claro ye qu’a la FSA lo único que-y interesa ye que la izquierda nacionalista caltenga l’estatus que vieno manteniendo nos caberos diecisiete años (3.800 votos nesti tiempu)

Non sólo hai un seutor d’Andecha que va facer tolos posible pa qu’esto nun cambie sinon que tamién la mesma FSA va facelo tamién. La FSA controla tolo que se mueve n’Asturies, tolos sectores sociales, políticos y económicos, dende la Xusticia, pasando pela Educación y hasta na mesma Sanidá privao, ye dicir TOO.

Personalmente, non sólo m’esmuel que la llinia estratéxica d’una parte de la izquierda nacionalista seya hermana de la de la izquierda española sinon tamién qu’esto lleva a entrugame en qué manes tuvimos hasta güei dellos nacionaliegos nestos más de dolce años de militancia n’ANDECHA . Agora yá somos a entender meyor el porqué dempués de fracasu tres fracasu electoral, dende la Executiva anterior al Conceyu de mayu en Candás, poníase muncho enfotu en repetir hasta la repunancia que tábemos nel bon camín, baxo anestésicos y tranquilizantes en forma de proclames como: “el camín ye mui llargu”, “nun hai otru camín” o que “les instituciones nun ye lo importante”…

Nestos díes la Izquierda Abertzale, sabedora que dende les instituciones ye onde meyor se pue camudar la realidá vasca, anda a la gueta d’un resquiciu llegal pa entrar neses mesmes instituciones, cosa mui estremada nel casu d’Asturies onde delles persones intenten secuestrar les sigles d’ANDECHA pa impedir que seyamos quien a entrar nes nuestres.

Esti seutor camienta que la entrada nes istituciones “nin ye dable, nin se considera prioritario” (MAF dixit). Ye equí onde los intereses de la FSA y de la izquierda española en xeneral , y los d´esti grupúsculo coinciden más a les clares.

¿Nun va siendo hora que la izquierda nacionalista emprime a quitar la venda a tola xente nacionaliego? ¿Nun ye hora d’entamar a denunciar esos intereses porcayonos que davezu coinciden dientro de delles estayes d’esa izquierda nacionaliega, colos de la FSA y los de la izquierda española tocántenes a la llinia a siguir?

¿Nun son abondos les coincidencies en puntos políticos y empresariales ente dellos allumaos de la izquierda nacionalista asturiana cola FSA? Ta claro que si, demasiaos.

Poro, compañeros, nun ye chocante qu’en cuantes el nacionalismu se ponga en camín de ser quien a camudar l’equilibriu elleutoral y polo tanto de poder, los resortes d’esi poder asitiáu n’Asturies entamen a actuar con tolos medios que tienen al so algame, que son cuasi toos, por nun dicir toos.

Namás en saliendo del ámbitu mafiosu y corruptu que manda n’Asturies sedremos a topar el camín afayaizu pa iguar la crisis d’ANDECHA y la suspensión de les candidatures d´UNIDÁ, persabiendo que los resortes d’esi poder yá fixeron el so apueste nesta crisis.

Aquellos que naguamos por una Asturies llibre y socialista nun vamos dexar de dar tira por algamar los oxetivos de que seya’l mesmu pueblu asturianu’l que tenga los posibles pa decidir llibremente’l so futuru; por construyir una izquierda nacionaliega que seya quien a caminar de manera digno, ensin complexos, pente les istituciones y círculos de poder y, como non, por quita-yos la venda d’ente los güeyos a los inconscientes y desenmazcaritar a los corruptos qu’actúen al marxe de los intereses non sólo d’Andecha sinon del nacionalismu d’izquierdes y los d’Asturies en xeneral.

Poro, por estes y por munches más razones ANDECHA ASTUR decide apostar pola coalición UNIDÁ, como’l mediu más amañosu pa inxerise dientro de les istituciones y de los círculos de poder y tener asina capacidá de decisión pa ser a tresformar esta realidá murnia, corrupta, mafiosa y antiasturiana.

Ye la vieya ferramienta la que tien que se tresformar nun preséu nuevu que seya a camudar la murnia realidá imperante d’anguaño.

UNIDÁ TIEN FUTURU.