Opinión

Lo païs que vòl viure 8.04.08

“Vos vau parlar d’un païs que vòl viure…”

Asina cantaba nos años setenta un occitanu: Marti. Con fuercia, ensin complexos, cantába-ylo al mundu. Y cuandu unu glaya con encamientu, la voz guaña.

El 16 de marzu de 2008 cumpliéronse 764 años de la matanza de 226 cátaros en Montsegur. Ellí, al pie del “monte seguru”, xunto a la llábana que recuerda la masacre, aconceyaron unes sesenta persones, representantes d’asociaciones y partíos políticos llegaos dende estremaes fasteres del Païs Occitan, pa reafirmar la so identidá como pueblu con una llingua y una cultura propies que vienen siendo tapecíes pol centralismu del Estáu francés dende cuantayá, dende aquel 1213 nel que, tres la batalla de Muret, entama la dominación francesa sobro’l territoriu occitanu.

Occitania ye un país que “quier vivir” y llucha p’algamar esi oxetivu, por eso ta vivu. Llucha trabayando nel tarrén cultural y coles armes dialéutiques d’una democracia bien entendía y dafechamente asimilada. Llucha, amás, col convencimientu del qu’ama lo que defiende: l’aire puro, l’agua non contaminao, el respetu pola tierra y los frutos que-y regala, polos árboles, pola arquiteutura tradicional, por nun estrozar les ciudaes… y una llingua cola que tresmitir esi conceutu de la vida.

Un pueblu asina ye quien a resistir l’allorie xabaz del modelu de globalización que carecemos porque tien nidies les sos señes d’identidá y l’oxetivu: el país. Y ye quien a facelo porque tien representación política. Pasu ente pasu, los partíos políticos occitanos vienen algamando representantes municipales, cantonales, fasta un diputáu, gracies a les estremaes combinaciones de partíos y grupos políticos nes diferentes zones del país.

El Partit Occitan, que ye’l qu’algama mayor representatividá, fundóse en 1987. ¡Un partíu mozu: vente añinos… y xorreciendo!

El Partit de la Nacion Occitana, qu’adoptó esti nome en 2002 (antiguu Partit Nacionalista Occitan, fundáu en 1959), con dos representantes municipales…

¿Y Asturies? ¿Quier vivir? “Vos vou parlar d’un païs que moris”.

Cuando un catalán que taba nel aconceyamientu de Montsegur faló del carbón y les mines a un occitanu, como referencia d’Asturies, remembré señardosamente aquella “Rebelión n’Asturies” qu’inmortalizare Albert Camus pa gloria de los protagonistes y vergoña de munchos prexubilaos que s’alcuerden del pasáu ente’l chigre y Benidorm.

¿Quier vivir l’Asturies compartida pol PSOE (la nueva derecha capitalista mazcaritada d’izquierda decimonónica y collaboracionista coles multinacionales nel espoliu de los nuestros recursos naturales) col PP (la vieya derecha de los nazarenos na cai, al más ranciu estilu franquista, xugando a la reivindicación llingüística y al “nacionalismu” de comenencia)? ¿Son otra cosa l’ PSOE y el PP que les dos cares de la mesma moneda –la que lleven pa Madrid, pal Bancu Mundial…- aidaos poles comparses de turnu?

¿Quier vivir l’Asturies amenazada por una regasificadora, por una tupía rede de llinies d’alta tensión, por ver afogar los valles más guapos camudaos en banzaos y contaminar les agües nes centrales de ciclo combináu? El “paraísu natural” tresformáu en formigón, en “parques temáticos”, en macrocentros comerciales; les industries pesllaes, la enseñanza y la sanidá camín de la privatización y l’esfarrape, la cultura “posmoderna” ensin vínculos col territoriu, la cultura propia despreciada ya desaniciada… La mocedá al debalu. La mocedá, colando fuera del país camín del “mileurismu” y el desenraizamientu. Y ¡qué dicir de la nuesa llingua!

Tres años pa sobrevivir y dempués… la escoyeta: vivir o morrer.

“La tèrra la coneissètsz
Es la vostra, amics…”

Pasónos el tiempu de la inocencia. Los fíos merecen un futuru, si pue ser, meyor qu’el del pá y la ma, pero enxamás peor. Y nun país tan pequeñu como esti yá ta nidiu’l mapa. Depredar ye la supervivencia de los primitivos, de los febles. Vender la tierra del collaciu, del pariente, del vecín ye arrampuñamientu. Vender la enerxía, consumir les enerxíes de tou un pueblu a costa de la so salú física y mental y esto amuésenlo les estadístiques , pa beneficiu d’unos pocos, ye vampirismu (válgome d’una espresión lliteraria seliquina).

Pero ye bien cierto que, amás de los déspotes que nos gobiernen, hai otres malures. Dalgunes precisen una autocura d’urxencia y tán en nós mesmos: mieos a nun se sabe qué, apoltronamientu, prexuicios, complexos d’inferioridá (con estremaes formes de manifestase) y enfotu en apegalos a los demás, reaición siempres en sen negativu y non col enclín constructivu, deliriu de grandonismu ranciu… ¿sigo? Hai otres de calter social: avieyamientu de la población, alienación de bona parte de la mocedá y ésodu de munchos, individualismu… Tamién podríe siguir cola enumeración, pero préstame más aventar unes entrugues por si l’airón les esparde: ¿Prúyenos facer dalgo? ¿Queremos facer daqué? (Si queremos, podemos.) ¿O préstanos más dexar “facer” y dexar “poder” a otros? ¿Sí? (Ves, sabíalo: préstate más esperar a ver si lo lleven los diaños pa poder criticalo, ¿eh? Mira que yes…) Ah, ¿non? (Entós de xuru que tienes bones idegues.

Munchos poderes xuntos son la meyor arma contra el Poder.)
Por cierto, ¿aú les voces de les muyeres? ¿Esperando que tornen los guerreros de la batalla pa prender el microondes?
Asturies quier vivir –pueo asegurávoslo. ¿Vamos yá, dafechu, a poner remediu a esta llaceria?

“Vos ai parlat d’un païs Que vòl viure!

---