Opinión

UNIDÁ nel Día de la Nación Asturiana 26.09.07

German Abad

Secretariu d'organización

Collacios, collacies:

Esti Día d’Asturies ye’l primeru que celebra UNIDÁ, porque ye’l primeru de la nuestra andadura. Tenemos unos pocos meses de vida como fuercia política y güei ye un día de compromisu con Asturies, pero tamién de reflexón y cellebración conxunta del nuestru sentimientu nacional.
UNIDÁ nun nació por caprichu d’unos pocos, nin tampoco nació pa repetir esperiencies fracasaes, UNIDÁ nació pa dar rempuesta a una necesidá y a una obligación. Necesidá: la d’enllenar y enanchar un espaciu políticu n’Asturies, que ye l’espaciu de la izquierda nacionalista. Obligación: la de tolos que vemos Asturies non solo como la nuestra tierra sinón tamién como la nuestra nación. Y esto decísmoslo güei, Día de la Nación Asturiana, pero vamos dicilo tolos díes del añu. Compañeros y amigos, yá aportó’l momentu de cumplir con esa obligación: la obligación de xunir penriba de delles diferencies, la obligación de mirar p’alantre sin escaecer el pasáu, la obligación de señalar a los responsables de la nuestra decadencia, la obligación de nun caer nel fácil victimismu, y la obligación de glayar, pero tamién de buscar y forciar soluciones a los nuestros problemes. ¿Qué ye sinon ser un verdaderu nacionalista?
Y facemos esto porque UNIDÁ nun ye una secta nin muncho menos un grupu d’aventureros políticos. UNIDÁ formámosla un conxuntu d’asturianos que vivimos metíos en problemes de desempléu y precariedá llaboral, cola permanente amenaza de la emigración pola desindustrialización y pola falta de trabayu y espectatives, con problemes pa llegar a tener una vivienda digna, en mediu d’especulación, inxusticia social y sistemes clientelares, y qu’al mesmu tiempu vemos secuestrada la nuestra identidá colectiva, ensin llingua oficial, ensin marcu estatutariu dignu, y ensin respetu al nuestru patrimoniu natural y cultural. Hai que desengañase: sólo dende la conciencia nacional, Asturies saldrá p’alantre, porque naide va trabayar por nós, naide va regalanos un res, y son munchos más los que vienen a arramplar que los que vienen a regalar. Y equí entra en xuegu, ensin dir más lloñe, la violencia istitucional, que tanto rescampla pa imponenos unos métodos que van pel camín del desaniciu y la decadencia d’Asturies. Una violencia istitucional que se ceba especialmente nos trabayadores y que torga derechos colectivos ya individuales, llaborales, llingüísticos y de toa triba. Nun tuvo escosáu precisamente esti añu de víctimes d’esta violencia istitucional, sería abondo complicáo nomales a toes, y vaiga por ello la norabona a Cándido y Morala, que de dalgún mou representen a toes elles, pol so gran exemplu de sindicalismu y compromisu, pola so honradez ya integridá nos peores momentos, y pola so llarga trayectoria exemplar na defensa de les y los trabayadores.
Nun pue dexase pasar de llargu esti día ensin una mirada a la nuestra hestoria, la hestoria de fai 70 años, cuando unos asturianos costituyíos nel Conseyu Soberanu d’Asturies y Lleón, ficieron una declaración qu’espresaba’l determín de qu’Asturies fuere la dueña del so presente y del so futuru, nunes circustancies especiales, ye verdá, pero que nun resten, sinón que sumen, a esti almirable enfotu de llucha pola soberanía y la llibertá, porque nun pue haber llibertá ensin enantes nun hai soberanía. Vaiga pa estos asturianos el más respetuosu homenaxe d’alcordanza permanente, al mio xuiciu el meyor de los homenaxes posibles.
Y yo entrúgome qué pensaría’l Conseyu Soberanu del actual Estatutu d’autonomía d’Asturies o del que quieren manganos dientro de pocu tiempu, de forma humildante una vegada más, ensin nenguna consulta a los asturianos y con un guión y unos actores tiñíos de roxo y gualda.
Collacios, collacies: nun pue dicise qu’esti seya un bon momentu p’Asturies, nun paez qu’el futuru más prósimu vaiga ser meyor qu’el presente, nun hai signos de meyoría, hailos de debilidá. Nun sería sinceru si dixere lo contrario; poro ye menester ver oxetivamente’l presente pa poder buscar un futuru meyor. “Xuntos podemos”, diximos fai pocu tiempu a los votantes dende UNIDÁ, y dellos millares d’asturianos diéronnos la so confianza, una confianza que pue ser l’entamu d’un futuru meyor p’Asturies. Nós sí somos quienes a algamalu. Y porque xuntos podemos, xuntos tenemos que siguir y xuntos vamos facer que xorreza’l nuestru enfotu pola nuestra tierra y pola nuestra nación. Esti ye’l verdaderu nacionalismu y esti ye’l nuestru compromisu con Asturies.

¡Puxa la Nación Asturiana!