Opinión

Ver el llau positivu 3.05.07

María Olaya Rubiera

Secretaria Xeneral d'Andecha Astur

Ayeri, mientres taba trabayando, camentaba lo abegoso que ye ver el llau positivu en tolos problemes que tamos sufriendo pa iguar la situación d’Asturies. Diba nel tren y vía cada vegada más ñubes, cargaes de suciedá y porcaúra; llueu entamó a llover enforma. Cuando aporté a una estación rescampló un poco’l temporal y aprució un migayín l’arcu la vieya pente les ñubes prietes.
Entós caltrié qu’agora n’Andecha tamos arrecostinando un bastiazu coyonudu a pie de cai. Delles persones tan “atechaes” esperando a que pase’l temporal, nun quieren moyase. Otros aprovechen pa ponese del llau de los que tán enllamuergándolo too, piensen qu’ellos son los mas gayos. Nun se decaten de que tán rebaxándose como seres humanos mintiendo nos xuicios y falsiando actes de conceyos y xuntes.
Pero dempués del bastiazu, too se ve más llimpio, los collores tan más vivos y respírase un aire non viciáu, un ambiente de paz. Mentantu, sal l’arcu la vieya: el verde-grupu verde, l’ amariellu d’IAS y el colloráu d’Andecha Astur y toos formen un conxuntu perguapu p’Asturies y bonu pal futuru la nuesa nación. Anque qu’agora malpenes se vea esi migayín, ceo va poder vese na so totalidá.
Y entós alcordéme del canciu de “La Flor del Agua”:
“Eses ñubes prietes d’intención, torgáronte cuantayá
pero agora va riscar el sol…NUN TORNARÁN ENXAMÁS”.