Opinión

Xuntos podemos 11.04.07

German Abad

Secretariu d'organización d'Andecha Astur

Llega una cita más coles elleiciones municipales y autonómiques. Y otra vez la izquierda nacionalista ensin dar un motivu seriu de preocupación a los partíos institucionales ya ensin llegar a los asturianos pa poder convencelos. Toos sabemos que’l día 27 de mayu nun habrá cambios drásticos dende’l nuestru puntu de vista, qu’el gobiernu del “Principado” seguirá siendo igual o peor, difícilmente meyor, y qu’el camin de desaniciu d’Asturies nun va aparar, a lo menos n’aspeutos clave del nuesu futuru como pueblu.

Énte esta situación cabe entrugase si ta fecho tolo que de nós depende pa camudar les coses. Dafechamente non; esta ye a lo menos la mio rempuesta. Cuando los partíos que conformen la izquierda nacionalista nun medren nidiamente en votos nin a la primera vuelta, nin a la segunda nin a la tercera, tien qu’haber razones oxetives pa pensar que dalgo nun va bien, pero al mesmu tiempu, cuando l’apisonadora españolista n’Asturies ye tan descomanada, ye razonable pensar tamién que l’oxetivu de crecer ye mui complicáu, lo que desixe estremar los escasos medios humanos y materiales pa sacar el másimu rendimientu. Nun toi d’alcuerdu colos que tapen los sos erros apellando a esa apisonadora como xustificación de tolos males, nin tampoco colos que defienden las esencies del so partíu hasta creer que son incompatibles con cualisquier otru. Estes dos coses pueden desplicar la triste hestoria de la izquierda nacionalista asturiana. Pero hai más razones: l’escesivu marafundiu de fuercies en “marcar el territoriu”, con un pasu alantre y dos atrás en munches iniciatives, creando n’otros munchos casos dos enemigos por cada amigu. Esto ye lo que produz como resultáu la falta d’enfotu y l’enfrentamientu y, poro, la disgregación y l’atomización, qu’en definitiva ye la marca hestórica de la esquierda nacionalista.

Cuando salí escoyíu Secretariu d’Organización dixi qu’Andecha Astur tenía qu’abrise más a los movimientos y organizaciones sociales y afitar les rellaciones coles organizaciones polítiques más averaes ideolóxicamente, tanto nel planu nacional como nel internacional, y qu’esti averamientu nun podía facese a costa de renunciar a lo que p’Andecha yeren principios fundamentales. Tamién dicía que la unidá nun yera un d’esos principios fundamentales, y ponía l’exemplu de que, na mio opinión, si non tenemos oficialidá del asturianu nun ye por falta d’unidá sinón por falta de presión, esto ye, que la presión pue llograse ensin falta d’unidá, o n’otres pallabres: de nada val la xunión si cada una de les partes que se xunten nun tien nidiu’l so compromisu de llucha.
Pero p’algamar la xunión fai falta un mínimu de convivencia pacífica, respetu ente les diferencies y altura de mires ente toles organizaciones que tán naguando por algamar esi oxetivu, ensin escaecer enxamás que los problemes llaborales y la dramática falta de trabayu de muncha xente pueden facer de frenu y debilitamientu, lo que nun dexa de ser humanamente entendible.
Dicho esto, y tornando al entamu, ye nidio qu’hasta agora nun taba fecho tolo que de nós dependía pa intentar camudar les coses n’Asturies. N’Andecha entendímoslo asina, y la mayoría de la organización escoyó dar un pasu alantre y negociar seriamente un alcuerdu elleutoral con Izquieda Asturiana. Ye bien cierto qu’esta decisión nun fue tomada por unanimidá, hebio una minoría de votos contrarios a esti alcuerdu, anque nun ye’l momentu de falar d’ello nin de les consecuencias de qu’esta minoría entendiera la llínia política aprobada por Andecha Astur de forma radicalmente incompatible con esti alcuerdu, pero sí ye cierto que la decisión tomóse de manera escrupulosamente democrática.
Y asina nació UNIDÁ, un proyeutu políticu que xunto a Los Verdes-Grupu Verde ufierta una alternativa nacionalista d’esquierda y ecoloxista p’Asturies. Son munchos los puntos que compartimos, la mayoría; pero tamién hai diferencies. Por eso tamos xuntos, pero non “revueltos”. Creo que dende Andecha podemos dicir que cumplimos con una obligación que teníamos pa con Asturies, porque creemos no que decimos y, amás, intentamos ponelo en práutica.

N’UNIDÁ vamos tener futuru na midida en que seyamos quienes a convivir coles nuestres diferencies y que tengamos mui presentes los erros del pasáu pa nun tornar a repetilos. Pero sobre too, vamos tener futuru si asumimos como de nós los problemes de los trabayadores, de los emigrantes y de la mocedá; si somos a dar una alternativa seria y viable a l’alarmante situación que vive Asturies en materia de mediu ambiente, especulación y vivienda, si en definitiva somos quienes a facer valer los nuestros derechos como pueblu.

P’algamar estos finxos paezme perimportante que seyamos capaces de dir entrando nes mentes de la xente cenciella, lo mesmo del paisanu del pueblu que del “urbanícola” que ye técnicu de grau mediu o superior, d’asumir y entender los sos problemes y puntos de vista, ensin desixir a toos ellos un cambiu drásticu de mentalidá. Pero p’algamar esti oxetivu tenemos que ser quienes a asumir tamién que nun tamos arrodiaos de traidores y vendíos, de xente ensin dignidá como asturianos, porque cenciellamente esto nun ye verdá.

De xuru qu’UNIDÁ nun va tar poles esperiencies de llaboratoriu y de despachu, pero sí va tar pa iguar una situación que tolos asturianos pescanciamos nidiamente: qu’Asturies va mal, mui mal.
Pienso que dende UNIDÁ tenemos qu’entender al enemigu políticu na so parte más positiva, la que de xuru inflúi pa que siga imponiéndose a nós. Nun se trata de copiar, pero sí d’aprovechar en beneficiu propiu la esperiencia de los otros p’arriquecer la nuestra.

Y falando d’enemigu políticu, los nomes nun puen ser otros: PP, PSOE ya IU.

PP y PSOE son ún la semeya del otru, a lo menos dende la óptica de la esquierda nacionalista asturiana, anque bien ye verdá qu’el PSOE parez poner un enfotu especial nel desaniciu de les nueses señes d’identidá, arriendes de que tantos años de gobiernu n’Asturies marquen un resclavu especial nesi desaniciu, con polítiques represives y criminalizadores de cualisquier disidencia, que lleven a despidos llaborales de calter políticu, a sanciones y penes de cárcel con acentu represor, a recortes tercermundistes de la llibertá d’espresión, y al pieslle en cadena d’empreses previamente subvencionaes.

Nel casu d’Izquierda Unida, hai una diferencia estremada. Mientres PP y PSOE nun escuenden la so fobia antiidentitaria asturiana, IU intenta tapecela, y nun sólo eso, sinón que tamién intenta ocupar un espaciu asturianista dende una postura basada íntegramente nel cómputu de votos despistaos. Porque IU nun cree no que diz, y a cambiu de tocar poder ta faciendo de cayáu del PSOE. Un cayáu que namás val pa contribuyir a amazcarar al PSOE al traviés del que llamen “gobiernu plural de la izquierda”. A los fechos me remito: ná de la oficialidá roblada, y ná o poco más que ná de mediu ambiente, vivienda, emigración, industrialización o llibertaes públiques, y eso sí, con un Estatutu de vergoña. Tolo cualo permite-y falar a IU de renovar el pautu col PSOE de magar el 27 de mayu. Ta nidio qu’ IU ye incompatible col proyeutu d’UNIDÁ, y qu’el proyeutu que representa p’Asturies ta agotáu por ser primu hermanu del PSOE ( la xente prefier copies orixinales a les imitaciones). Cuando IU defienda el drechu d’autodetermín d’Asturies, dexe d’engañar cola oficialidá y denuncie les polítiques qu’agora sofita dende’l gobiernu del “Principado”, entamará a ser mas creyible y tará menos desprestixiada. Pero esto ye pidir un imposible.

Falando sinceramente, nun veo otru proyeutu seriu pal futuru d’Asturies qu’el proyeutu d’UNIDÁ. De dalgo tienen que valinos los munchos años d’esperiencia y de llucha por aquello que siempre defendimos. Ye cierto que tenemos carencies, que vamos xustos pa les elleiciones, que falta muncho por facer, pero ye tamién cierto que nun mos falta ilusión y condiciones oxetives, pesia les dificultaes. Toi convencíu de que s’entama un nuevu camín pa ufiertar a los asturianos, dende la unidá de los más prósimos de la esquierda nacionalista asturiana. Vamos salir p’alantre. Xuntos podemos.